AZƏRBAYCAN-LATVİYA ƏLAQƏLƏRİ DAHA DA MÖHKƏMLƏNİR

31/05/17

Mayın 30-da Latviyada rəsmi səfərdə olan Milli Məclisin Sədri Oqtay Əsədovun başçılıq etdiyi nümayəndə heyəti bu ölkənin Baş naziri Maris Kuçinskis ilə görüşüb.
Baş nazir M.Kuçinskis Azərbaycan ilə açıq və konstruktiv siyasi dialoqu yüksək qiymətləndirərək qeyd edib ki, iki ölkənin iqtisadi sahədə əməkdaşlığı da yüksələn xətlə inkişaf edir.
Milli Məclisin Sədri Oqtay Əsədov dedi ki, ölkələrimiz arasında imzalanmış 34 sənəd əməkdaşlığın qurulması üçün möhkəm normativ-hüquqi bazadır. İki ölkənin ərazi bütövlüyü və dövlətlərin suverenliyi kimi beynəlxalq hüquq prinsiplərinin aliliyinə dair prinsipial mövqe dəyişməz qalır.
Görüşdə Azərbaycan ilə Latviyanın qarşılıqlı əlaqələri və əməkdaşlıq perspektivləri müzakirə olunub.

*     *     *

Həmin gün Latviya Prezidenti Raymonds Veyonis Milli Məclisin Sədri Oqtay Əsədovun başçılıq etdiyi nümayəndə heyətini qəbul edib.
Latviya Prezidenti nümayəndə heyətini səmimi salamlayıb və Azərbaycanın milli bayramı – Respublika Günü münasibətilə təbriklərini çatdırıb.
Yüksək diqqətə və qonaqpərvərliyə görə Prezidentə təşəkkür edən Oqtay Əsədov qeyd edib ki, Azərbaycan ilə Latviya dost və tərəfdaş ölkələrdir. Sevindirici haldır ki, hazırda siyasi münasibətlərin müsbət məcrada inkişafı müşahidə olunur. Ənənəyə çevrilən qarşılıqlı səfərlər və yüksək səviyyədə görüşlər ikitərəfli münasibətlərin daha da dərinləşməsinə töhfə verir.
Latviya Prezidenti vurğulayıb ki, ölkəsi ilə Azərbaycan arasında siyasi dialoqun intensivliyini belə bir fakt da sübut edir ki, hər iki ölkənin xarici işlər, iqtisadiyyat, nəqliyyat və müdafiə nazirləri daim əlaqə saxlayırlar. R.Veyonis məmnunluq hissi ilə qeyd edib ki, iki dövlət arasında körpü rolunu oynayan Azərbaycan icması Latviyanın ayrılmaz tərkib hissəsinə çevrilib.
R.Veyonis bildirib ki, hazırda Azərbaycan enerji və tranzit sektorlarında Avropa İttifaqının mühüm tərəfdaşıdır. Latviya bir sıra enerji layihələrində, o cümlədən TAP və TANAP kimi layihələrdə Azərbaycanın rolunu yüksək qiymətləndirir.
Oqtay Əsədov vurğulayıb ki, Milli Məclis GUAM PA çərçivəsində Baltik Assambleyası ilə sıx əməkdaşlıq edir. Bu əməkdaşlıq Azərbaycan və Latviya parlamentləri arasında əlaqələrin möhkəmlənməsinə xidmət edir.
İkitərəfli münasibətlərin dərinləşməsinin əhəmiyyətini vurğulayan tərəflər ümidvar olduqlarını bildiriblər ki, belə məxsusi maraq və diqqət Azərbaycan ilə Latviya arasında qarşılıqlı tarixi əlaqələrin genişlənməsinə və inkişafına bundan sonra da kömək edəcək.
Mayın 30-da nümayəndə heyəti Vətənə qayıdıb.

Milli Məclisin
Mətbuat xidməti

Müəllif hüquqları qorunur.
© Azərbaycan Respublikasının Milli Məclisi, 2007
İstifadə qaydaları | Ünvan | Linklər | Saytın xəritəsi